चिर्युमा अगस्ट १६ मा हुने मिनी एशिया फुटसल प्रतियोगिता, १० देशको सहभागितासहित भव्य तयारी
आगामी अगस्ट १६, २०२६ मा जापानको चिर्युस्थित Sugi Pharmacy Chiryu Welfare Arena मा आयोजना हुन लागेको Mini Asia Futsal Tournament को तयारी अन्तिम चरणमा पुगेको आयोजक Aichi Sports Promotion Association ले जनाएको छ। एशियाली एकता, मैत्री र खेल भावना प्रवर्द्धन गर्ने उद्देश्यले आयोजना गरिएको यो प्रतियोगितामा एशियाका १० देशहरू—नेपाल, भारत, चीन, दक्षिण कोरिया, जापान, थाइल्यान्ड, भियतनाम, क्याम्बोडिया, म्यानमार तथा इन्डोनेसिया—को सहभागिता रहनेछ। “One Asia, One Team” भन्ने नाराले प्रतियोगिताले खेलकुदमार्फत एशियाली समुदायबीचको सम्बन्धलाई अझ मजबुत बनाउने लक्ष्य राखेको छ।
प्रतियोगिता बिहान ९ बजे सुरु भई दिउँसो ४ बजेसम्म सञ्चालन हुनेछ। विभिन्न देशका खेलाडीहरूका साथै स्थानीय संस्थाहरू—Chiryu High School, Yamamoto Gakuen, GTS Cooperative Association, H&A Japanese Language School—को सहभागिताले कार्यक्रमलाई अझ विविधतापूर्ण बनाउने अपेक्षा गरिएको छ। खेलमैदानमा सम्मान, मैत्री र प्रतिस्पर्धात्मक भावना कायम राख्दै खेलिने यो प्रतियोगिता क्षेत्रीय तथा अन्तर्राष्ट्रिय खेलाडीहरूका लागि महत्वपूर्ण अवसरका रूपमा हेरिएको छ।
SBI Remit प्रायोजकका रूपमा सहभागी रहेको यो प्रतियोगिताले खेलकुदमार्फत सांस्कृतिक आदान–प्रदान, अन्तर्राष्ट्रिय मैत्री तथा समुदायबीचको सहकार्यलाई सुदृढ बनाउने उद्देश्य राखेको छ। आयोजकले सबै सहभागी टिम, खेलाडी तथा समर्थकहरूलाई स्वागत गर्दै यो वर्षको संस्करणलाई अझ भव्य र अविस्मरणीय बनाउन तयारी पूरा भएको जनाएको छ।
